Mustaqilligimizning 35 yilligi muborak bo‘lsin!
O‘zbekiston Respublikasi mustaqilligining 35 yilligi munosabati bilan O‘zbekiston Respublikasi Fanlar akademiyasi Mikrobiologiya instituti jamoasi barcha yurtdoshlarimizni, ilm-fan va ta’lim sohasi vakillarini, hamkor tashkilotlar hamda aziz vatandoshlarimizni samimiy muborakbod etadi.
Mustaqillik - xalqimizning o‘z taqdirini o‘zi belgilash, milliy qadriyatlari, ma’naviy merosi va buyuk kelajagini bunyod etish yo‘lini tanlagan tarixiy va qutlug‘ sanadir. O‘tgan 35 yil davomida yurtimizda barcha sohalar qatori ilm-fan, ta’lim, innovatsiya va zamonaviy texnologiyalarni rivojlantirish, ilmiy salohiyatni yuksaltirish hamda ilmiy ishlanmalarni amaliyotga keng joriy etish borasida muhim natijalarga erishildi.
Bugungi kunda Yangi O‘zbekiston taraqqiyotida ilm-fan va innovatsiyalarning o‘rni tobora ortib bormoqda. Xususan, mikrobiologiya, biotexnologiya, ekologiya, qishloq xo‘jaligi va tibbiyot kabi strategik yo‘nalishlarda olib borilayotgan ilmiy tadqiqotlar mamlakatimizning barqaror rivojlanishiga munosib hissa qo‘shmoqda.
O‘zR FA Mikrobiologiya instituti jamoasi mustaqillik yillarida mamlakatimiz ilm-fani taraqqiyotiga munosib hissa qo‘shib kelmoqda. Institutda mikroorganizmlarning xilma-xilligi, sistematikasi, biologik, fiziologik-biokimyoviy, genetik va molekulyar xususiyatlarini o‘rganish, ular asosida biologik faol moddalar, biotexnologik mahsulotlar, biologik preparatlar, biostimulyatorlar va biopestitsidlar yaratish, qishloq xo‘jaligi, oziq-ovqat, tibbiyot, farmatsevtika va ekologiya sohalari uchun innovatsion yechimlar ishlab chiqish bo‘yicha fundamental va amaliy tadqiqotlar olib borilmoqda.
Fursatdan foydalanib, barcha yurtdoshlarimizga mustahkam sog‘lik, oilaviy xotirjamlik, farovonlik va ulkan zafarlar tilaymiz. Vatanimiz ravnaqi, xalqimiz farovonligi va yurtimiz taraqqiyoti yo‘lida amalga oshirilayotgan ezgu ishlar bardavom bo‘lsin!
O‘zbekiston Respublikasi mustaqilligining 35 yilligi muborak bo‘lsin!
Mustaqilligimiz abadiy, yurtimiz tinch va osmonimiz musaffo bo‘lsin!
A. Qodiriy ko'chasi 7B
